بەرەنگاربوونەوەی تێرۆریزم

یەکەم: بنەمای دەستووریی بەرەنگاربوونەوە

کۆماری کوردستان، تێرۆریزم بە هەموو شێوەکانییەوە، بە هەڕەشەیەکی بوونایەتی بۆ سەر دەوڵەت، پەڕگاڵی دەستووری، و ئاسایشی نەتەوەیی دادەنێت. لەسەر ئەم بنەمایە، دەوڵەت ئەرکدارە بە بەرەنگاربوونەوەیەکی هەمەلایەنە و بێ پسانەوە لە ڕێگەی قانوون، هێزی سەربازی، دەزگای هەواڵگری، و ڕێکاری داراییەوە. هیچ کردەوە یان گرووپێکی تێرۆریستی لەژێر هیچ پاساوێکدا ڕەوایەتیی پێ نادرێت و سازشی لەسەر ناکرێت.

دووەم: پێناسەی قانوونیی کردەوەی تێرۆریستی

هەر کردەوەیەکی بە مەبەست کە بە مەبەستی تێکدانی پەڕگاڵی دەستووری، دروستکردنی ترس و تۆقاندنی گشتی، یان ناچارکردنی دامەزراوەکانی دەوڵەت بە ئەنجامدانی کارێک یان وازهێنان لێی ئەنجام بدرێت، بە تاوانی تێرۆریستی هەژمار دەکرێت. ئەم پێناسەیە بەتایبەتی ئەم کردەوانە دەگرێتەوە:

٢.١. کردەوەی توندوتیژی دژی ژیانی مەردم، بەرپرسانی دەوڵەت، یان نوێنەرانی بیانی.

٢.٢. ڕفاندن و بارمتەگرتن.

٢.٣. بەکارهێنانی شتگەلی تەقەمەنی، کیمیایی، بایۆلۆژی، یان ئەتۆمی.

٢.٤. هێرشی ئەلیکترۆنی (سایبەری) بۆ سەر ژێرخانە ژینەکییەکانی وڵات.

٢.٥. وێرانکردنی دامەزراوە گشتییەکان، شوێنەوارە مێژووییەکان، یان هێڵەکانی وزە و پەیوەندی.

٢.٦. هەر چالاکییەکی ڕێکخراوی دیکە کە بەپێی قانوون بە هەڕەشە بۆ سەر ئاسایشی کۆمەڵایەتی پۆلێن کرابێت.

سێیەم: تاوانە پەیوەندیدارەکان

ئەم کردەوانەی خوارەوە بە تاوانی سەربەخۆ و هاوشانی کردەوەی تێرۆریستی هەژمار دەکرێن:

٣.١. داراییکردنی تێرۆریزم: دابینکردن یان کۆکردنەوەی هەر جۆرە سامانێک بە مەبەستی بەکارهێنانی بۆ کاری تێرۆریستی.

٣.٢. هاندانی تێرۆریزم: بڵاوکردنەوەی هەر گوتارێک کە پاساو بۆ کردەوەی تێرۆریستی بهێنێتەوە یان هانی ئەنجامدانی بدات.

٣.٣. ڕاکێشان و ڕاهێنان: ڕاکێشانی ئەندام یان ڕێکخستنی هەر جۆرە ڕاهێنانێکی سەربازی یان ئایدۆلۆژی بۆ گرووپە تێرۆریستییەکان.

٣.٤. پەنادان و ئاسانکاری: دابینکردنی پەناگە یان هەر جۆرە ئاسانکارییەکی لۆجستیکی بۆ ئەنجامدەرانی تاوانی تێرۆریستی.

چوارەم: باری قانوونیی تاوانەکە

٤.١. هیچ کردەوەیەکی تێرۆریستی بە تاوانی وارگێڕی دانانرێت.

٤.٢. ئەنجامدەران، نەخشەدانەران و هاندەرانی تاوانی تێرۆریستی، بە شێوەیەکی هەردەمیی لە گشت مافە وارگێڕییەکانیان بێبەش دەکرێن.

٤.٣. ئەو کەسە بیانیانەی کە لەسەر خاکی کوردستان بەشداری لە کردەوەی تێرۆریستیدا دەکەن، مافی وەرگرتنی پەنابەری یان هەر جۆرە پارێزبەندییەکی تایبەتیان نابێت.

پێنجەم: چوارچێوەی دەستووریی بەرەنگاربوونەوە

٥.١. دەوڵەت بۆ بەرەنگاربوونەوەی تێرۆریزم، دەزگایەکی نیشتمانیی تایبەتمەند دادەمەزرێنێت کە دەسەڵاتی هەواڵگری، لێکۆڵینەوە و ئۆپەراسیۆنی پێویستی هەبێت.

٥.٢. دادگاییکردنی تاوانە تێرۆریستییەکان لە دەسەڵاتی دادگایەکی تایبەتمەندی ئاسایشی نەتەوەییدایە.

٥.٣. کۆماری کوردستان پابەندە بە هاوکاریی نێودەوڵەتی بۆ بەرەنگاربوونەوەی تێرۆریزم.

شەشەم: بنەماکانی سزا

٦.١. سزای تاوانە تێرۆریستییەکان دەبێت لەگەڵ قورسیی تاوانەکەدا بگونجێت و ڕووبەڕووی توندترین سزای دیاریکراو لە قانووندا ببێتەوە.

٦.٢. ئەم تاوانانە بە تێپەڕبوونی کات کۆن نابن و ناکەونە ژێر هیچ بڕیارێکی لێبوردنی گشتی یان تایبەتەوە.

حەوتەم: ڕێکخستنی قانوونیی

قانوونێکی تایبەت، وردەکاریی هەموو بڕگەکانی ئەم بەندە، دەسەڵاتە تایبەتەکانی دەزگای دژەتیرۆر و ڕێکارەکانی دادگاییکردن دیاری دەکات.