ئەرکی باڵای نیشتمانی

پاراستنی سەربەخۆیی، سەروەریی و یەکپارچەیی خاکی کوردستان، و ڕێزگرتن و پابەندبوونی بێ مەرج بەم دەستوورە و قانوونەکانی وڵات، ئەرکێکی پیرۆز و بەرپرسیارێتییەکی ئەخلاقی و قانوونیی سەرشانی هەموو شارۆمەندێک، ڕێکخراوێک، و دامەزراوەیەکە کە لەسەر خاکی کوردستان دەژین یان کار دەکەن. هیچ ماف و ئازادییەک کە لەم دەستوورەدا هاتووە، ناشێت وەک پاساوێک بۆ زیانگەیاندن بە ئاسایشی نەتەوەیی و بەرژەوەندییە باڵاکانی نیشتمان، لاوازکردنی کۆڵەکەکانی دەوڵەت، یان تێکدانی پەڕگاڵی گشتی بەکاربهێنرێت.

یەکەم: بنەماکانی ئەرکی نیشتمانی

١.١. وەفاداری بۆ دەوڵەت: هەر شارۆمەند و دامەزراوەیەک پابەندە بە وەفاداریی ڕەبەق بۆ کۆماری کوردستان و دامەزراوە دەستوورییەکانی.

١.٢. پاراستنی سەروەریی: بەرگریکردن لە سەروەریی و یەکپارچەیی خاکی وڵات ئەرکی هەمووانە.

١.٣. پابەندبوون بە دەستوور: ڕێزگرتن و پابەندبوون بەم دەستوورە و هەموو قانوونەکانی وڵات، بنەمای سەرەکیی ژیانی کۆمەڵایەتی و وارگێڕییە.

١.٤. پاراستنی ئاسایشی نەتەوەیی: هەر شارۆمەندێک ئەرکیەتی کە هاوکاریی دەزگا هەدارییەکان بکات بۆ پاراستنی ئاسایشی نەتەوەیی.

دووەم: سنووردارکردنی مافەکان لە پێناو بەرژەوەندیی گشتی

٢.١. ماف و ئازادییەکانی ناو ئەم دەستوورە ڕەها نین و لە کاتی پێکدادان لەگەڵ بەرژەوەندییە باڵاکانی نیشتمانیدا، دەکرێت بەپێی قانوون سنووردار بکرێن.

٢.٢. ئەم سنووردارکردنە دەبێت تەنیا لە باریی زۆر پێویستدا بێت و لەگەڵ بنەماکانی دیموکراسیدا بگونجێت.

٢.٣. قانوون وردەکاریی ئەو بارانە و میکانیزمی سنووردارکردنەکان دیاری دەکات، بۆ ڕێگریکردن لە بەد بەکارهێنانی دەسەڵات.