بەندە نەگۆڕەکان: گەوهەری بوونایەتی و پەیمانی هەردەمیی

یەکەم: بنەمای نەگۆڕی: پاراستنی ڕۆحی کۆمار

١.١. ئەم بەندانەی خوارەوە، نەک هەر بەندەگەلی قانوونیی، بەڵکوو کۆدی بۆماوەیی، ویژدانی مێژوویی و گەوهەری بوونایەتیی کۆماری کوردستان پێک دەهێنن. ئەوان دەرئەنجامی ویستی مێژوویی، پەیمانی خوێنی شەهیدان و ئاواتی نەوەکانی داهاتوون. هەر هەوڵێک بۆ دەستکاریکردنیان، هەوڵێکە بۆ کوشتنی ڕۆحی کۆمار و هەڵوەشاندنەوەی ئەو پەیمانە پیرۆزەی کە نەتەوە لەسەری بنیات نراوە.

١.٢. لەبەرئەوە، ئەم بەندانە بە هیچ شێوەیەک ناکەونە ژێر پڕۆسەی هەموارکردنەوەوە. ئەوان لە سەرووی ویستمەندیی کاتیی وارگێڕییەوەن و هەرگیز و لەژێر هیچ بارودۆخێکدا و بە هیچ زۆرینەیەک، هەموار ناکرێنەوە.

دووەم: لیستی بەندە نەگۆڕەکان

٢.١. ئەم بەندانەی خوارەوە وەک بنەما بنەڕەتییەکانی پەیمانی نەتەوەیی، نەگۆڕن:

ئا. فۆڕمی کۆماریی دەوڵەت (وەک لە بەندەکانی ١ و ١١ـدا چەسپێنراوە) وەک تاکە دەربڕی ویستی گشتیی کورد و دانەدواوەی هەر شێوازێکی تری دەسەڵاتداری.

ب. بنەماکانی سەروەریی ڕەبەق و پێشێلنەکراو، یەکپارچەیی خاکی مێژوویی و پێناسەی کوردستان وەک وارگەی نەتەوەیی نەگۆڕی نەتەوەی کورد (وەک لە بەندەکانی ١، ٣، ٤ ـدا هاتووە).

پ. ئاڵای نەتەوەیی (وەک لە بەندی ٢ـدا پێناسە کراوە) وەک هێمای دانەبڕاوی شوناس و سەروەری.

ت. بنەما سەرەکییەکانی شوناسی نەتەوەیی، پاشماگی شارستانی و خاوەندارێتیی مێژوویی کورد بەسەر ئەم خاکەوە (وەک لە بەندی ٥ـدا هاتووە).

ج. بنەمای خاوەندارێتیی ڕەهای نەتەوەیی بەسەر خاکەوە و ڕێکخستنی مافی بەکارهێنان (وەک لە بەندی ٨ـدا هاتووە).

چ. پێناسەی دەستووریی جینۆسایدی کورد، ئەرکی یادکردنەوە و تاوانبارکردنی نکۆڵیکردن لێی (وەک لە بەندی ٤٤ـدا هاتووە).

ح. دانپێدانان بە دەوڵەتی ئیسرائیل و ڕێنەدراوکردنی دژەجووبوون (وەک لە بەندی ٧٧ـدا هاتووە) وەک بنەمایەکی ڕەوشتی و ستراتیژیی هاوچارەنووسی.

خ. بنەمای زمانی کوردی وەک تاکە زمانی فەرمی و کۆڵەکەی شوناسی نەتەوەیی (وەک لە بەندی ٩٦، بڕگەی یەکەمدا هاتووە).

د. ئەم بەندە خۆی (بەندی ١٢٨) وەک کەرەسەی پاراستنی هەموو بەندە نەگۆڕەکانی تر و گەرەنتیی درێژەدارییەتیی پەیمانەکە.

سێیەم: پێناسەی کردەوەی دژە-دەستووریی

٣.١. هەر هەوڵێک، چ بە شێوەی پێشنیازی قانوونیی، بڕیاری کارگێڕی، ڕاپرسیی گشتی، پەیماننامەی نێودەوڵەتی، یان کردەوەی فیزیکی، کە ئامانجی ڕاستەوخۆ یان ناڕاستەوخۆی هەموارکردنەوە، هەڵپەساردن، یان پووچەڵکردنەوەی یەکێک لە بەندە نەگۆڕەکان یان گەوهەرەکەی بێت، بە کردەوەیەکی دژە-دەستووریی ڕوون و کودەتایەک دژی گەوهەری بوونایەتی و مانەوەی کوردستان وەک وڵاتی سەربەخۆ و کورد وەک نەتەوە هەژمار دە کرێت.

چوارەم: دەرەنجامە قانوونییە ڕەها و دەستبەجێکانی پێشێلکاری

٤.١. هەر قانوون، بڕیار، یان کردەوەیەک کە بکەوێتە چوارچێوەی پێناسەی سەرەوە، بە شێوەیەکی ڕەها و لە بنەڕەتەوە پووچەڵ و بێکاریگەرە. هیچ هێزێکی قانوونیی نییە و هیچ پابەندبوونێک دروست ناکات.

٤.٢. هەر هەوڵێکی لەم چەشنە، بە هێرشێکی ڕاستەوخۆ بۆ سەر مانەوەی دەوڵەت و ئاسایشی نەتەوەیی دادەنرێت.

پێنجەم: ئەرکی پیرۆزی پاراستن لە ئەستۆی دامەزراوەکان و نەتەوەدا

٥.١. پاراستنی ئەم بەندە نەگۆڕانە، بەرزترین ئەرکی دەستووریی سەرکۆمار، گشت ئەندامانی دەسەڵاتی قانووندانان، دادوەران و هەر ئەفسەر و سەربازێکی هێزە چەکدارەکانە. سوێندی وەفاداریی ئەوان بۆ ئەم دەستوورە، لە بنەڕەتدا سوێندخواردنە بە پاراستنی ئەم گەوهەرە نەگۆڕە.

٥.٢. لە باریی ڕوودانی هەر هەوڵێکی دژە-دەستووریی بۆ دەستکاریکردنی ئەم بەندانە، ئەرکی دەستووریی سەرشانی گشت دامەزراوەکانی دەوڵەتە کە بە هەموو توانایەکی قانوونیی و فەرمیی خۆیانەوە بەرپەرچی بدەنەوە و پەڕگاڵی دەستووریی بپارێزن.

٥.٣. پاراستنی ئەم بەندانە، ماف و ئەرکی پیرۆزی هەر تاکێکی کوردستانە.

شەشەم: لێخۆشنەبوون و دادگاییکردنی تایبەت

٦.١. کردەوەی دژە-دەستووریی دژی بەندە نەگۆڕەکان، دەکەوێتە چوارچێوەی تاوانی باڵای ناپاکیی نیشتمانییەوە و لە دادگای تایبەتمەندی ئاسایشی نەتەوەیی دادگایی دەکرێت.

٦.٢. ئەم تاوانە بە تێپەڕبوونی کات کۆن نابێت و بە هیچ شێوەیەک لێخۆشبوونی گشتی یان تایبەتی نایگرێتەوە.